सांबार वडी/पुडाची वडी

सांबार वडी/पुडाची वडी

साहित्य

कोथिंबीर (निवडून, धुवून,चिरून, पसरुन ठेवावी), मिरची-लसूण-जिरे ठेचा,तीळ,धणे भरड, काजू-बदाम-किसमिस, खोबऱ्याचा किस,शेंगदाण्याचा कूट,हळद,तिखट,धणे, तीळ, मैदा,बेसन,हिंग,तेल,मीठ

कृती

• १ मोठी वाटी मैद्यात २ चमचे बेसन,तिखट,हळद,तेल,मीठ घालून घट्ट कणीक मळून घ्यावी.
• कढईत तेल तापल्यावर काजू बदाम किसमिस खरपूस तळून घ्यावेत.
• हिंग,धणे,तीळ,ठेचा, हळद,तिखट,खोबऱ्याचा किस, शेंगदाण्याचा कूट चांगले भाजून घ्यावे, मग यात कोथिंबीर घालून मिश्रण कोरडं होईपर्यंत चांगलं परतून घ्यावे.
• काजू,बदाम, किसमिस घालावेत आणि मिश्रण थंड होऊ द्यावे.
• कणकेचे लिंबाएवढे गोळे बनवून पारी लाटून वरील मिश्रण भरून आयताकृती आकारात वडी व्यवस्थित बंद करून घ्यावी.
• तेल तापले की वड्या तळून घ्याव्यात.

मस्स्स्त... लागतात...😋😋

जयश्री खराडे.

🔻🔻🔻🔻🔻🔻🔻🔻🔻🔻🔻🔻🔻🔻🔻🔻

वैदर्भीय सांबारवडी

तयारी-साॅससाठी

चिंचेच्या कोळात काळा मसाला, गूळ, मीठ चवीप्रमाणे घालणे.

पारीसाठी -

दीड वाटी बेसन, अर्धी वाटी कणीक, मिरची पावडर, मीठ, तेल चवीप्रमाणे, बेकींग पावडर व ओवा अगदीच चिमटीभर घालून कणीक मळून ठेवावी.

सारणासाठी

मोठी कोथिंबीर गड्डी धुवून, निथळून, बारीक चिरुन ठेवणे.
अर्धी वाटी सुके खोबरे, पाव वाटी खसखस, थोडेसे तीळ सुरमट भाजून घेणे.
बारीक चिरलेला १ कांदा,
आले, लसूण, हिरवी मिरची वाटण,
काळा मसाला.
काजू, बेदाणे चवीनुसार तळून.

कृती

• तेल तापवून मोहरी तडतडावी.
• कांदा चांगला गुलाबीसर परतून आले-लसूण पेस्ट परतावी.
• त्यावर मिरची पावडर, मीठ घालून मिक्स करावे. त्यावर धणा-जिरा पावडर, किंचित काळा मसाला, काजू, बेदाणे, खसखस, खोबरे, तीळ, वाटीभर बेसन घालून खमंग परतणे. •वरुन गूळाची पावडर, कोथिंबीर घालून सर्व मिश्रण चांगले एकत्रित करुन गॅस बंद करावा. •मिश्रण थंड होऊ द्यावे.
•कणकेची लिंबाएवढी पारी घेऊन ती उभट लाटावी, त्यावर पातळसर साॅस लावून कोथिंबीरीचे मिश्रण पसरावे.
•फोटोत दाखवल्याप्रमाणे वडी बंद करुन तेलात खमंग तळून घ्यावी.

दीपाली प्रसाद

धन्यवाद!!

#ज्ञानभाषामराठीप्रतिष्ठान

#अन्नपूर्णा